Arte definida

Sobre a liberdade de expresión na arte e por que é universal.

Preguntóusenos na clase pola diferenza da liberdade de expresión no fala e na arte. Eu falei sobre a universalidade da arte, pero logo quedei pensando e cheguei ás seguintes definicións persoais:

Se segundo Antoine de Saint Exupery no libro do Principiño o máis importante non se ve senón co corazón, xa que é invisible aos ollos, eu defino:

* A arte é a ciencia de poñer os pelos de punta levada á práctica.
* A arte é un dicionario sensorial.
* A arte é a ortografía da alma, que non coñece gramáticas.
* A arte é a voz melódica cuxo ritmo vén marcado polo metrónomo do corazón.
* A arte é a fotografía do que hai dentro de todos e cada un de nós (non é unha radiografía, graciosos).

Falcón Negro e os guiris sobre rodas

Dato irrelevante: seica os estadounidenses seguen sendo guiris aínda que volvan á casa. Unha empresa de pinturas en Denver ten un cartel grandísimo no que se le claramente: http://www.guirys.com .

Este finde sentiámonos con sorte e achegámonos a Black Hawk (sen derrubar), o pequeno Las Vegas (Las Veigas pronunciado aquí) de Colorado. Como pobre exemplar, soamente gastei en beber algo mentres vía como os meus colegas perdían diñeiro.

As fotos non son miñas, senón do Señor Interné, pero mostran ese estraño pobo sen casas nin restaurantes: soamente casinos e os seus respectivos hoteis. Todo isto, en medio das montañas, onde non hai nada máis. Aínda así, autobuses non paran de chegar cheos de vellos con ganas de gasta-los cuartos nos comecartos. Parque Xeriátrico indeed amigos. Nunca vira un sitio onde as plazas ocupadas fosen as de minusválidos e as outras estivesen tan baleiras.

Ata outra.

Fotos de Denver á noite

Estas son as vistas que me reciben ao saír de clase.












Este é o centro das artes escénicas de Denver.













Unha pequena galería anterior a un patio de restaurantes.


















O 'ceo estrelado' de Larimer Street.












E ata aquí a miña achega de hoxe. Durante a semana espero tomar fotos do que vén sendo o campus da universidade e algo máis que vaia vendo por aí.

De Vigo a Denver

E cun cambio de imaxe comeza a miña andanza documentada por esta terra afastada. Adeus bigote e benvido un 'look' ao máis puro estilo 'Morgan' no Ano da Carracha (aquí rematan as similitudes co personaxe).
Agora espéranme unhas horas de estudo e traballo de clase, pero confío en poder darme unha volta coa cámara pola cidade de Denver para tentar amosar a que será a miña cidade durante o próximo par de anos.

Aquí déixovos unha canción que escribín hai un par de noites, preso da morriña:

Ruxen os ventos

Laian as pingas de orballo nos fentos

E laio eu se penso

Na miña Galiza en calquera momento

Desta saudade

Quen me vai gardar

Desta saudade

Lonxe do meu lar

Sons dunha terra

Que amence tan cedo

Que cando está en tebras

Eu sombra non teño

Desta saudade

Quen me vai gardar

Desta saudade

Lonxe do meu lar

Dos ríos ás fontes

Que viu Rosalía

Eu envexo os montes

Que gardan a Ría

Asubío as cantigas

Que os meus aturuxan

Ninguén se me amiga

Ninguén cantarruxa